រាជធានីភ្នំពេញ ៖ លោកកែប ជុតិមា ទីប្រឹក្សាផ្ទាល់សម្តេចអគ្គមហាសេនាបតីតេជោ ហ៊ុន សែន និងជាអភិបាល រាជធានីភ្នំពេញ រួម ជាមួយមន្ត្រីជំនាញ និងមន្ត្រីសាលារាជធានីភ្នំពេញជាច្រើននាក់ទៀតបានអញ្ជើញទៅពិនិត្យមើលសំណង់ច្រាំងទន្លេជ្រោយចង្វាដែលកំពុងស្ថាបនាយ៉ាងមមាញឹកដោយក្រុមហ៊ុនសុខាអូតែល ក្រោយពីបានបើកការដ្ឋានសាងសង់អស់រយៈពេល៨ខែរួចមក ។
លោកឌៀប ចេងហេង អគ្គនាយករងក្រុមហ៊ុនសុខាអូតែលបានឱ្យដឹងថា ដំណើរការនៃការសាងសង់ច្រាំងទន្លេនេះ បានចែកចេញជា៣ដំណាក់កាលដែលរហូតមកដល់ពេលនេះសម្រេចបានជាង៥០%ហើយនិងសង្ឃឹមថា នឹងបានរួចជាស្ថាពរតាមការគ្រោងទុកក្នុងរវាង១៨ខែ គឺអាចរូចមុនសំណង់ស្ពានជ្រោយចង្វាថ្មី ប្រសិនបើគ្មានឧបសគ្គដោយធម្មជាតិទេនោះ ។ សំណង់ច្រាំងទន្លេជ្រោយចង្វាឬច្រាំងទន្លេសាបត្រើយខាងកើតជាសំណង់ធំមានប្រវែង៣.០០០ម៉ែត្រចាប់ពីគល់ស្ពានជ្រោយចង្វាដល់សំណង់សណ្ឋាគារសុខាស្ថិតនៅក្បាលជ្រោយចង្វាដែលបានបើកការដ្ឋានសាងសង់តាំងពីថ្ងៃទី៨ ធ្នូ ឆ្នាំ ២០១១ រួមទាំងការស្ថាបនាផ្លូវ និងសូនច្បារស្របមាត់ទន្លេសាបដែលគ្រោងចំណាយថវិកាសាងសង់ចំនួន២១.១៤២.៣៤៨ដុល្លារអាមេរិកដែលថវិកាទាំងនេះបានមកពីការវិនិយោគទីតាំងសណ្ឋាគារសុខាអូតែលជ្រោយចង្វារ ។
លោក កែប ជុតិមា មានប្រសាសន៍ថា នេះជាសំណង់ប្រវត្តិសាស្ត្រនាសម័យតេជោសែន ដែលសាងសង់មានលក្ខណៈបច្ចេកទេសត្រឹមត្រូវ និងអនុវត្តតាមអនុសាសន៍របស់សម្តេចតេជោគឺអភិវឌ្ឍន៍ខាងលិចមិនភ្លេចខាងកើត ។ លោកអភិបាលមានប្រសាសន៍ទៀតថា ពីមុនតំបន់ជ្រោយចង្វាហាក់នៅឆ្ងាយដាច់ស្រយាលពីរាជធានីភ្នំពេញ ប៉ុន្តែពេលនេះជ្រោយចង្វាបានក្លាយជាចំណុចអភិវឌ្ឍន៍ប្រកបដោយសក្តានុពល ជាកន្លែងលំហែកម្សាន្តសម្រាប់ភ្ញៀវទេសចរក៏ដូចបន្ថែមសោភ័ណភាពទីក្រុងឱ្យកាន់តែស្រស់បំព្រង ។ លោកកែប ជុតិមា បន្ថែមថា ពេលនេះជ្រោយចង្វាបានក្លាយជាកោះមាស,កោះប្រាក់ពិតៗ ។
នេះជាសមិទ្ធផលថ្មីមួយទៀតសម្រាប់រាជធានីភ្នំពេញដែលមិនធ្លាប់មានពីមុនមក ។ លោកបានណែនាំដល់មន្ត្រីជំនាញ ក៏ដូចជាក្រុមហ៊ុនទទួលការស្ថាបនាត្រូវប្រកាន់យកឱ្យបានត្រឹមត្រូវតាមលក្ខណៈបច្ចេកទេស និងប្រកបដោយសោភណ្ឌភាពស្របពេលដែល រាជធានីភ្នំពេញធ្វើជាម្ចាស់ផ្ទះនៃកិច្ចប្រជុំកំពូលASEANក្នុងខែវិច្ឆិកាខាងមុខ ព្រមទាំងព្រះរាជពិធីបុណ្យអុំទូក បុណ្យឯករាជ្យជាតិដែលជាព្រឹត្តិការណ៍សំខាន់ៗនឹងកើតឡើងក្នុងខែវិច្ឆិកានេះ ដែរ ។ លោកក៏បានណែនាំមិនឱ្យមានការនេសាទត្រី ឬចាប់សត្វផ្សេងៗនៅមុខព្រះបរមរាជវាំងដែលរាជរដ្ឋាភិបាលបានកំណត់ជាតំបន់អភ័យភូមិ ៕
No comments:
Post a Comment